აპანი, 2020 წელი

***
ადამიანს ყველაფერი აროდეს ეცოდინება. ტოტალიტარული რეჟიმების პროპაგანდა კი ცდილობს არცოდნის მოცემული ვაკუუმის საკუთარი დამპალი და მზამზარეული “ცოდნით” შევსებას.

***
დიდი სიყვარულის გარეშე დიდი ხელოვანი ვერ გახდები.

***
სიყვარულით, სიკეთითა და სულიერი პრინციპებით ცხოვრება წუთისოფლის გამოვლინებათა ეკალ-ბარდში ღმერთკაცობრივი მოწამეობაა.

***
ისეთი დრო დადგა, რომ ადამიანები ცხოვრებისეული ოცნებების ასრულებას უფრო ადვილად ახერხებენ, ვიდრე ნამდვილი სიყვარულით ცხოვრებას.

***
ეროვნული განწყობა კონსტრუქციულ და პრინციპულ დამოკიდებულებას უნდა ეფუძნებოდეს.

***
ვუზიარებთ რა სხვას საკუთარ თავს, ამით ყველაზე უკეთ ვპოულობთ და ვსწავლობთ ჩვენ თავს. და რამდენჯერაც პირიქით მოვიქცევით, იმდენჯერ დავკარგავთ თავს.

***
სიბრძნესთან შეუღლებულ მეცნიერებას თუ შეუძლია მიაღწიოს აღმშენებლობითი კეთილგონიერების სიმაღლეებს.

***
გამოსავალი მისკენ შეუქცევადი სვლაცაა.

***
სიყვარული-მარადიული სიცოცხლის გასაღები.

***
დასავლური ცივილიზაცია დესპოტიზმის დაძლევაა და ყოველთვის, როდესაც მისი ეს მისწრაფება მარცხს განიცდის, დასავლეთი წარსულის ტყვე ხდება.

***
ასაკი იმსახურებს პატივისცემას, მაგრამ ჭკუა-უფრო.

***
მცოდნე მშვიდობითაა ძლიერი.

***
მცოდნე არ ძალადობს, რადგან მისი ძალა ძალადობისაგან განსხვავდება და იგი მშვიდობაზეა დამყარებული.

***
შინაგანი სიბრმავე ძალადობისკენ უბიძგებს ადამიანს.

***
ცოდნის სიძლიერე მშვიდობაშია.

***
მცოდნის ძალა მშვიდობაშია.

***
მცოდნის ძალა მშვიდობაა.

***
ცოდნამ რომ პარადიგმა შეცვალოს, პროაქტიური უნდა იყოს.

***
პოლიტიკა ადამიანების შინაგან სამყაროთა ერთმანეთთან შეხვედრის ფორმაა.

***
უხერხულში რომ არ ჩავარდე, უნდა ეცადო, რომ შეძლებისდაგვარად ყველას და ყოველთვის მოხერხებულად და გასაგებად გააგებინო ვითარება.

მარიამობისთვე, 2011 წელი

* * *
ერი ზეპიროვნული ოჯახია.

* * *
სიმართლის თქმასა და კეთებას მხოლოდ ვაჟკაცობა კი არა, ღირსებაც სჭირდება.

* * *

სიყვარული ქმნის სინამდვილეს.

* * *

ვერ ვიწამებ ისეთ ადამიანს, ვისაც ღმერთი უყვარს და მოყვასი სძულს, ან პირიქით. იმ კაცის მჯერა, ვინც ოქროს წონასწორობას პოულობს უფლისა და მოყვასის სიყვარულში.

* * *

კაცი გულისხედვით დაბრმავებული რომ არ იყოს, დაინახავდა, რომ იმაზე უფრო გასაოცარ სამყაროში ცხოვრობს, ვიდრე ზღაპრების სინამდვილეა.

* * *

კაცს იმაზე მეტი შეუძლია, ვიდრე წარმოუდგენია, მაგრამ ღვთის ნების გარეშე ერთ უმცირესს ნაბიჯსაც კი ვერ გადადგამს.

* * *

თუკი ზედმეტს ვლაპარაკობ, ესე იგი, ჯერ კიდევ ბევრი რამ მაქვს სასწავლი.

* * *

ტექნოლოგიის განვითარება კაცობანაკლული ადამიანების ზედაპირულობას კიდევ უფრო ზრდის.

* * *

ძალიან ბევრი უნდა გავიგოთ იმისათვის, რომ მივხვდეთ, თუ რაოდენ ზღვაში წვეთსაც კი არ წარმოვადგენთ ღმერთის გარეშე და ღმერთის წინაშე.

* * *
ნუ გაცდუნებთ ქალის გარეგანი სილამაზე. იგი წარმავალია. ენდეთ მისი შინაგანი მშვენიერების კონკრეტულ ნაბიჯებს, რომელსაც ვერანაირი დრო ვერ წარხოცავს.

* * *
სულიერი ადამიანისათვის ქალის შინაგანი მშვენიერება გაცილებით უფრო ძვირფასია, ვიდრე მისივე რაგინდარა გარეგნული სილამაზე.

* * *
საკუთარ თავს სატრფოსთან, თუ სულიერ მეგობართან ერთობით თუ შეიცნობ და იპოვი მხოლოდ. სხვაგვარად, მუდამ მოტყუვდები და ვერ გამოაღწევ ამაო წუთისოფლის სიცრუის ლაბირინთიდან.

* * *
ამაო წუთისოფელსა და გონებას დაქვემდებარებული ცნობიერების მქონე ადამიანისათვის პოეზიის ბუნება, განზომილება და გათავისება უცხო, მიუწვდომელი და გაუგებარი რამაა.

* * *
ფილოსოფია პოეზიაში თუ არ ამაღლდება, პირველი მკვდარი და უსულო ხდება, მეორე კი – სუსტი და ზედაპირული

* * *
ნამდვილი პოეზია ისაა, რომელიც უპირველესად სულის ფურცლებზე იწერება.

აპნისი, 2011 წელი

* * *
თუკი სულმა არ ეძია ღმერთი, გაცილებით უფრო ადრე დალპება, ვიდრე გარდაცვალების შემდეგ ჩვენი სხეული.

* * *
ზედმეტი ზრდილობა არ ვარგა-შენ თუ არა, სხვას აფუჭებს.

* * *
თუკი სიკეთის კეთებამ შინაგანად სიხარული არ მოგანიჭა, ან ის არაა სიკეთე, ან შენ ხარ მკვდარი სიკეთისთვის.

* * *
ყველაზე ძვირფასი სიტყვები ისაა, რომელთაც მარგალიტებივით კრიბავ საკუთარი შინაგანი სამყაროს ოკეანის უღრმესი ფსკერიდან.

* * *
სიყვარული ნებისმიერ პრინციპზე მაღლა დგას.

* * *
სიყვარული თვითონაა უზენაესი პრინციპი.

* * *
ზოგჯერ კაცუნები თავიანთ პატარა სიხარულში უფრო ბედნიერები არიან, ვიდრე ბუმბერაზები საკუთარი დიდი მოწოდების გზაზე სვლაში.

* * *

ცხოვრება მაშინ ხდება გაუგებარი, როდესაც საკუთარ თავს ვერ ვუგებთ.

* * *

გრძნობდე ადამიანის სულს, ეს ნიშნავს, ხედავდე მას.

* * *

აკეთებდე იმას, რასაც გრძნობს საყვარელი ადამიანის სული, ნიშნავს ხედავდე მის შინაგან სამყაროს და ერწყმოდე მას.

* * *

სიკეთე ნამდვილია და სინამდვილე.

* * *

ხელისუფლება სამართლიანი ძალაუფლებაა. სხვაგვარად იგი ძალადობა ხდება.

* * *
ადამიანები დოგმატიკას შესაბამისი ცხოვრებისეული გამოცდილების გარეშე გონების მიერ ჭვრეტით გაზიარებულ ხისტ და მშრალ სიტყვათა კრებულად აქცევენ მაშინ, როდესაც მასში ღმერთის თბილი და მოსიყვარულე სუნთქვა იგრძნობა.

* * *
სამართლიანი ძალაუფლება არის ხელისუფლება, უსამართლო კი-ძალადობა.

* * *
საკუთარი თავის დაუფლებით (თავის-უფლება) იწყება ნამდვილი სიცოცხლე

* * *
არა გუშინ, არა დღეს, არა ხვალ, არამედ სამივე ერთად.

* * *
სიყვარულის გადმოსახედიდან ბოროტება ერთ უუმცირეს წერტილადაც არ ღირს.

* * *
მსოფლიოს მეტი პოეზია სჭირდება, რაც ფურცელზე ლექსის წერას არ გულისხმობს მხოლოდ, არამედ ადამიანის გულსა და თვით, ადამიანებს შორის პოეზიის ქმნას, განხორციელებას.

* * *
საქმეა ყველაზე დიდი სიტყვა, თორემ სიტყვა უსაქმოც, ცარიელიც და საქმესთან შეუსაბამოც შეიძლება იყოს. ეს უკვე სიტყვა კი არა, ტყუილია

* * *

Quando la società non è talmente matura per creare dentro se stessa la forza, che lo rappresenti, al posto del governo rovesciato verrà un gruppo politico come prima (o peggiore del primo) e non la forza del popolo. In questo caso nessun governo generato fuori dalla società migliorerà la vita del popolo-soltanto quello che provviene dal popolo stesso. Ma per questo, prima di tutto, deve maturare la società stessa. E questo non avviene subito, ci serve un lungo tempo e lavoro duro

როდესაც საზოგადოება არაა საკმარისად მწიფე, რათა საკუთარ წიაღში წარმოქმნას თავისი ინტერესების გამომხატველი და განმახორციელებელი ძალა, მაშინ რაც არ უნდა სხვა მთავრობა მოვიდეს, მუდამ წინანდელის მსგავსი უფრო იქნება (ან უარესი), ვიდრე ხალხიდან და ხალხისათვის წარმოქმნილი ხელისუფლება. ამ შემთხვევაში, საზოგადოების ფარგლებს გარეთ ნაშობი ძალაუფლება ვერ გააუმჯობესებს მოსახლეობის ცხოვრებას. ეს შესაძლებელი იქნება ოდენ ხალხის წიაღში დაბადებული მთავრობისათვის, თუმცა, ამისათვის თვითონ საზოგადოების მომწიფებაა აუცილებელი, რაც არ ხდება ხანმოკლე მონაკვეთში; ეს დიდ დროსა და უშურველ მოღვაწეობას საჭიროებს.

მკათათვისა, 2010 წელი

* * *
უზენაეს სიბრძნეთაგანია, როცა ნებისმიერ პირობებში ჰარმონიული ხარ საკუთარ თავთანაც და გარესამყაროსთანაც.

* * *
საქართველოს მუდამ ღვთითკურთხეული საქართველო თუ აერთიანებდა ოდენ…

* * *
დუმილში დაბადებული მუსიკა გულის ნიაგარების ძალისაა.

* * *
ამპარტავნება უგულო ყინულეთია.

* * *
გრძნობა გულის ხედვაა.

* * *
ხელმწიფება ტიტული კი არა, საკუთარი ერის მსახურებაა.

* * *
თავისუფლება საკუთარი თავის გაცნობიერება კი არაა ოდენ, მისი გრძნობაცაა.

* * *
თავისუფლება საკუთარ თავში გონებისა და გრძნობის შეხმატკბილებული გამარჯვებაა.

* * *
სიკეთე ცოდნისა და სიბრძნის მომდევნო, განხორციელებული საფეხურია.

* * *
იმარჯვებენ სიყვარულის სიბრძნითა და ვაჟკაცობით. ყოველგვარი სხვაგვარი გამარჯვება ილუზია და სიცრუეა.

* * *
სხვა თუ გძულს, ესე იგი, არც საკუთარი თავი გიყვარს.

* * *
აზრის გასიტყვება ნახევარი საქმეა.

* * *
კეთილი იდეის სიძლიერე მის ქმნა-განხორციელებაშია.

* * *
ღმერთს საქმით უფრო უახლოვდებიან, ვიდრე საუბრებით.

* * *
ქრისტიანული განახლება ღმერთთან დაბრუნებისა და ამ სასწაულით გამოწვეული უნაპირო, ენითგამოუთქმელი ბედნიერების მარადიული პარადიგმაა.

* * *
სიცოცხლე საცხოვრებელია.

* * *
ცხოვრება მოქმედებაში მოყვანილი, ამოძრავებული სიცოცხლეა.

* * *
სიცოცხლე ღვთიური ტალანტია, რომელიც შეიძლება შენი სულის ოთახში მდგარ კიდობანში გამოკეტო, ან გაასულიერო და გაივსო მისით. პირველი ცხოვრების ილუზიას ბადებს და სიცოცხლის დაკარგვამდე, შინაგან კვდომამდე მიჰყავს ადამიანი, მეორე კი მზესავით განათებულს ხდის ადამის ნაშიერს.

* * *
ფიქრებით სიახლოვე და გულით სიახლოვე სხვა და სხვა რამეა, თუმცა, ერთი მეორეს არ გამორიცხავს და ერთმანეთს ავსებენ.

* * *
სიყვარული და მეგობრობა შინაგანი თუ გარეგანი შეჭირვებიდან მუდმივი საუკეთესო გამოსავალია.

* * *
საკუთარი თავი რომ შეიცნო, ჯერ უნდა დაინახო იგი.

* * *
ადამიანი საკუთარ თავს უკეთ სულიერი დიალოგის დროს ხედავს.

* * *
გონებისმიერი ცხოვრება სტატიურია… გულისმიერი კი-დინამიური.

* * *
გულკეთილობა და კეთილგონიერება ერთმანეთს ავსებენ, მაგრამ წინამძღოლი პირველია.

* * *
ადამიანის შინაგანი სიმწიფე ჯერ კიდევ არ ნიშნავს ბედნიერებას. პირველი მეორის ჭურჭლად თუ გამოდგება.

* * *
სიცოცხლეს უფალი ღმერთი მშობლების მეშვეობით გვანიჭებს, ცხოვრება კი სიკეთის ზეიმია.

* * *
ბაგის კიდეები ბედნიერების ბარომეტრია…

* * *
ადამიანებს გვიკვირს ხოლმე, თუ რატომაა სიცოცხლე ძალადობითა და უსამართლობით სავსე. არადა, ამის მიზეზი თითოეულ ჩვენთაგანშია. ჩვენ რომ მართლა ვ-ც-ხ-ო-ვ-რ-ო-ბ-დ-ე-თ, ცხოვრება სიკეთის ზეიმად იქცეოდა.

* * *
ვისი შინაგანი სამყაროც სიკეთით, სიყვარულით, სიმამაცითა და პასუხისმგებლობითაა სავსე, ანუ ვინც ნაღდი ცხოვრებითაა გავსებული, ის ერსა და სახელმწიფოზე ზრუნავს. ვინც შინაგანად ცარიელია და გარეგნული ზიზილ-პიპილოებით სავსე, საკუთარი ფუტურო საქმეებით ცხადად აჩენს თავის ნამდვილ სახეს